كلمات الأستاذ : هاشم صديق
الحان وآداء الموسيقار : محمد الامين
لما شُفتِك..
ليلِى ضَّو وبَقَّ نور
ونرجس الجنه المفرهد
رفّ بجنحَات عطور
وغنَّى فارسِك
خَتَّ صورتِك فى الإطار
فى الليالى نَجِم يِلالى
ونسمه فى وهج النهار
وقال فى وَصفِك لما بنتى
أحلى مِنِّك برضُه إنتِى
ومافى غيرِك زول معانا
حتى كان يالسمحه غِبتى
ومَرّه جَالَن الف خَاطِر
بعيون عقلى المسَاهر
فجأه عينيكِ الحبيبه
قالوا سارح وين مِسَافِر..!؟
عِشتَ قولِن شيل وصَفقَه
وقُلت بس ياريتنى ابقى
همسه فى حُلم الأميره
أو سَبَايب فى الضفيره
أو عِقيد فى تِبرِ جيدها
أو قليب فى راحة ايدها
يازمان أسمعنى واكتب :
البَرِيدها وريدها سِيدى
وريدِى سِيدَها
الزمان لوحتى بالغ
ماأظِن فى زول يعيدها
ياحَلاتِك..
مره همسه..
ومره نَسمَه..
ومره هَلّت نَجْمه غابت
ومره صَحْوَة غمزه نامت
ومره ضحكه تَرَضِّى شوقنا
ومره كلمه تضِّوى فوقنا
ولمّا نسرح فيكِ قَادلَه
زى ملايكه علينا نازله
وبَس نغنى :
ياحلاتكُم ياأهَلنَا
يامصابيحنا ونجومنا
الضّاويَه فى واحات زَمَننَّا
ليست هناك تعليقات:
إرسال تعليق