غلطة (1-6)
كلمات الأستاذ : إسماعيل حسن
الحان وآداء الفنان : محمد وردى
قاسي قلبك علىَّ ليه لو بحب يبقى ذنبى إيه..
قلبى توب من عواطفك ايه نهاية حبهُ إيه..
غلطه كانت غرامى ليك وآخسارة دموعى فيك..
غلطة قلبى سلمتهُ ليك ماكان مكانه ماكان يجيك..
يوم لقيتك على ماكان يوم يامبدد شجونى آه..
عنى ايه قالوا عنى إيه..
كنت تائه وكنت غريب وانا إفتكرتك اعز حبيب..
ياما قلبى يخطى ويصيب والعذاب لى كان نصيب..
من عرفتك جفانى حتى النوم يامبدد شجونى آه..
انت حبك جنيت عليه..
كان طلعت القمره وجيت ولو حلفت برب البيت..
مابريدك مهما بقيت غلطة كانت وتانى ابيت..
ياالفراقك على كان مقسوم يامبدد شقاى انا..
إنت حبك جنيت عليه..
صُدفه (2-6)
كلمات الأستاذ : إسماعيل حسن
الحان وآداء الفنان : محمد وردى
صدفة وأجمل صُدفه انا يوم لاقيتها..
أسعد يوم يومي الحييتها..
نور عينيَّ ياما حبيتها..
النظرات بريئه وممزوجه بخجل..
البسمات تضوي زي نور الأمل..
وجهك بين مسايرك زي بدر إكتمل..
والشامه في خديدك زي طعم القُبل..
تسكر قلبي وتشعل حبي يشهد ربي انا بهواك..
ما قادر اقولك عن حبي الكبير..
وصفه علي قاسي وعايش في الضمير..
قدر الكون ده كله حبي واكبر بي كتير..
مالكني محيرني شوف قلبي الأسير..
اسألي قلبك يمكن يقدر يشرح حبي أنا محتار..
صدفه عيوني شافت ليلي الباكي نوَّر..
يا أيام ربيعي عمري معاكِ أزهر..
فيها الطير يغني ومن الحاني يسكر..
قلبى فراشه حولك وإنتِ شبابك أخضر..
ياما بحبك بعبد حبك علشان حبك روحي فداك..
المُرسال (3-6)
كلمات الأستاذ : محمد على ابوقطاطى
الحان وآداء الفنان : محمد وردى
مسكين البدأ يأمل أملهُ يغلبهُ تحقيقهُ..
والعاشق الجفا المعشوق الليله وآ سهرهُ ونشاف ريقهُ..
امش قول ليهُ ياالمرسال عساهُ يراعي ملهوفهُ..
حبيبك و بى وراك جارت عليهُ وخانتهُ ظروفهُ..
فقد صبرهُ شرد نومهُ لهيب الشوق هلك جوفهُ..
نحول جسمهُ شحوب لونهُ براك أحسن تعال شوفهُ..
مسكين..
مسكين..
براي سويتها في نفسي قلبي الحب ما واعي..
عشق زولاً مجافيهُ وما كان للحصل داعي..
اقول إتناسي حبهُ يزيدتزيد بالتالي أوجاعي..
طريق الحب مشيت فيهُ تعذر تاني ارجاعي..
مسكين..
مسكين..
خطاباتي البوديها تقول لا بتمشي لا حاجه..
وديت ليهُ زول مرسال والمرسال مشى وماجا..
بقيت انا والنجوم بالليل سوا نساهر ونتناجى..
والناس اللي كانوا سبب رموني وصبحوا فراجا..
مسكين..
مسكين..
جمال الدُنيا (4-6)
كلمات الأستاذ : كمال محيسى
الحان وآداء الفنان : محمد وردى
بشوف في شخصك أحلامي ودنيا تفيض بأنغامي..
وسحِر الدنيا في عيونك يبعد عني أوهامي..
بشوف الكون جميل وبديع مُّر أيامي يبقى ربيع..
احب الدنيا لي حبك ويسعد حبك أيامي..
رياض وزهور على خديك بديعه بتخلب الأنظار..
تزيد فوق الجمال الفيك معالم كلها اسرار..
تخلي الدنيا في عيوني جمال وكمال بتجدد..
أمل بسَّام بيحدوني اغني إليك واتودد..
ولحني الغالي اهديهُ اليك وانبت للوجود أزهار..
ياحبيبي الدنيا ما احلاها بديعه وحلوه بين ايديك..
فهل أيامي تنساها.. تسلاها إذا ماغبت عن عينيك..
هويتك صرت ولهانك عشقت الدنيا دي علشانك..
كتير جددت ذكراها كتير غنيت بشوقي إليك..
الهوى الأول (5-6)
كلمات الأستاذ : الجيلى عبدالمنعم
الحان وآداء الفنان : محمد وردى
أخادع نفسي بى حبك وأمنيها..
واهرب حتى من ذكراك والآقيها..
دموع الحسره في عينيَّ أخفيها..
نار الشوق أقول الصبر يطفيها..
أقول أنساكَ وأنسى شقايا لو قادر..
وطول الغربه والحرمان بلا آخر..
أسيبك كيف وأنت الناهي والآمر..
كيف اصبر وعارف نفسي ما صابر..
شبابي معاك ما أضيِّع أمانيهُ..
وعمر هواك ما أقصر لياليهُ..
رضيت بى ظلمهُ أحياهُ اقاسيهُ..
ولو خلاني مابقدر أخليهُ..
تخاصم وتفتكر إحساسي إتبدل..
وقايل قلبي مال لسواك و إتحول..
وحياة ريدتنا وحياة الهوى الأول..
بنرجع تاني لو زاد الجفا وطوَّل..
حنيّه (6-6)
كلمات الأستاذ : إسماعيل حسن
الحان وآداء الفنان : محمد وردى
لو بكايَّا هماكَ .. ولو شقايَّا اشقاكَ..
ما كنت يوم فارقتني خاصمتني عذبتني..
ياما دربك كنت بفرشهُ ورد وحنَّيه واماني..
ياما عهدك صنتهُ ماخنتهُ وكان ليكَ حناني..
ياما من ليلي ونهاري ودمعي بنسجلك اغاني..
وكل كلمه من غنايَّ فيها من حبك معانى..
إن نئيت برجاكَ..
وإن نسيت بطراكَ..
وان قسيت بهواكَ..
جيت اعاتبك واشتكيلك واشرح الحب من بدايتهُ..
قلبي خاضع ما برافع بس عليك تسمع حكايتهُ..
انت حاكمهُ انت مالكهُ وانت في ايدك وصايتهُ..
وانت لو حكمت قلبك ما اظن ترضى بنهايتهُ..
العهود صونوها..
اوعوا لاتخونوها..
ده حرام تنسوها..
تبقى جنبى وننسي كل الدنيا نغرق فى الامانى..
واشتكيلك ياحبيبى منك إنت ومن زمانى..
فى غيابك ياما ليل الغربه بالآلآم رمانى..
ابكَى عينى ..
وابكَى روحى..
وابكَى قلبى ياحنانى..
ياامل يالقيا حنيه وينك من عيونى..
لو تعود وتجينى القى فيك حنينى وانسى بيك انينى..
إبتساماتك ربيع دنيايا ياما عشت فيها..
فتحت في قلبي اشواق الليالي البشتهيها..
دي السعاده المن زمان بسأل عليها..
بكياني بشبابي بحياتي افتديها..
الإله يرعانا..
ده الغرام ضمانا..
نحنا ما احلانا..
لو بكايَّا هماكَ .. ولو شقايَّا اشقاكَ..
ما كنت يوم فارقتني خاصمتني عذبتني..
ليست هناك تعليقات:
إرسال تعليق